1Cor 5 | ASO | STEP | Evene' muki' nete lengi' muliseu' nene vene' vemoholite iga' ani' monovo goloso ma soto' neive li li'mi nimonave. A'mine inite' nene mono' gilamaa' avetingukisi isa'mani' inite' atoli'mine goloso ve. A'mine inite' nene evene' ma lengi' muliseu' neiveli'mo melehi elenahine dave.

1 Corinthians 5

Kolidi Alevetingu' Vene' Vemoholite Iga' Ani' Monovo Goloso Nene Soto' Ingumu' Paulo' Line'

1 Evene' muki' nete lengi' muliseu' nene vene' vemoholite iga' ani' monovo goloso ma soto' neive li li'mi nimonave. A'mine inite' nene mono' gilamaa' avetingukisi isa'mani' inite' atoli'mine goloso ve. A'mine inite' nene evene' ma lengi' muliseu' neiveli'mo melehi elenahine dave. 2 Ido' lingine inite' ne'mine soto' ine' nemu' nene okodido' gili longovozo hilami monoku' dize nonive ne none li nanimu' okodine di hozi li nizave. Lingine agae li longovozo hili lengi' muliseuti' a'mine monovo goloso dave nene imiseli hulilizanako imiseli hulamave. 3 Naza nene oko'ne'vesi hota minuvoni'za vo'ne nene lengita lengikisi maka' minine' gelave. Ido' maka' lengikisi minune' gelavo a'mine inite' goloso ive'mi gamazi've nene gelo ti' lo lo huko luve: 4 Lingine mulise milikevo neni' vo'nedunu' lengikisi minune' gelavo Guvetesi ve Izesu' aza do amuzo molo-lengedavo eze velemu' igi monovo goloso daa' ive nene goni' i-di imiselikevo aza nene lengi' muliseuti' lemo Satani'mi anau' vavo ne'mo monovo goloso daa' ine' oko'no've nene vo goloso ogavo alinge' Guvelesi ve ti'no aline' gameneu' nene a'mine ve'mi sikalahu' do u' izelingumu' ve li lihime imi imiseli hulilizave.

6 Monovo goloso ne'mine daa' ive aza lengi' muliseu' neivo lingine mono' gele guno o none li lingine okodine di hozi li nizani' nene lamine' amive. Beleti do lulu izaa' ine' inite' zisiti nene ngomo lasolo ma doo beleti lolo' olone' palauva' vaiku' nene nososi do gopo okunivo a'mine zisiti ne'mo palauvaku' mono osu' laa' neine' nene gilamani' nehe. Ido' a'mine'mine ogo lihime goloso daa' ive hamokovo' nene lengiku' minavosa ne'mi lihime nene lengi' mukita dizavosa mulisetine nene goloso oga' neive. 7 Nemu' nene O'moso'mo Zuda veti avotemote Aigita misubou' minani' ise'ine izingumu' gili holise' minilisa numudeu' zisiti minamilive li numu'ninguti' zisiti vise' igi di hulaa' nani' ne'mine igi lingine lihimete nomine' minelone li goloso inite' lengita noline' nene vise' igi di hulilo. Ido' Zuda vete a'mine ise'ine izine' holisekumu' nene sipisipi angale ma bilaa' nani' ne'mino leli' sipisipi angale Kilisito'nisi bilikevo leli' lihimetemu' hiline' nenako lingine lamine' lihimetine nomine' nizani' gele neive. 8 Nemu' nene Zuda vete a'mine holise' minaa' nani' gameneu' gameneu' nene zisiti hulamavo lulu izamine' beleti ni minaa' nani' ne'mino laza nene litehe inite' zisiti ne'mino lute golososi monovo golososi lelita minamine' mino lute lisihe' laminekisi mino inite' lamine' gihilevo' ogo molo minelone.

9 Luhuvo inite' gomu' ma ti' lo gize lingimuvoni' ma neive: Lingine nene vene' vemoho' monovo goloso gopo' napa iga' avesi bizi moni zogo mili namilo lo lo-lengede nouvoni' ma neive. 10 Nene luvoni' nene me misubou' aleve O'mosomu' gilamani' heta ato' aleve ma gopo'napa monanikisi ido' mumuzo' iga' avesi gumine gizengize vesi ido' soza o'mosomu' ngopo'ni laa' avesi mudise huli-ngidi mini kegesi minilo luvodini ne'mine ve misubo vaito' mini'mi monaa' nani' nenako huli-ngidi mini kegesilisa huli-ngidi zaa' misubola vadine. Lingine misubo muki' huli mala ngeli vamilisanako ma mini kegesilizave luvodini ngeli ne'mine amilizado' luvodine. 11 Nemu' nene luhuvo gize lingimuvoni' gamazi'mi monovo ma nene ne'mino neive: Evene' ma Izesu' evenele leli' muliseuti' none laa' nave vene' vemoho' engi' nete monovo goloso iga' ilizani' nehe mumuzo' iga' ilizahe soza o'mosomu' ngopo'ni laa' ilizahe noso ni sipaki iga' ilizahe ido' gumine gize ngize ve minilizahe ne'mine ve nesi nene bizi moni zogo milamilizave. Ee, noso' nite' engikisi maka' mo keke' namilizave. 12 Naza nene mono' gilamani' aleve engi' monovomu' ize' molo lo huko-ngedaa' gono nene neni' gono nomine' nenako engikumu' nene lamuve. Heta mono' gilamave engi' monovo'inemu' ize' molo laa' nene O'moso'mi gono neive. Ido' lengi' muluseu' mono' nigilani' aleveti gamazi'inemu' laa' nene lengi' gonotine ma nenako damilizahe. Nemu' nene mono' godolou' ti' lo minine' nene gili dalo: Ve ma ingine monovo goloso daa' niilizave nene lengi' mulisetingu' minamilizaze. nGimiseli hulilo.